البوم يوم المحن والمحن تلد المحن، قالوا اتحاد الصحفيين عمل ورشة مقفولة أو ملتقى بفندق كانون دعى لها صحفيي الخارج مدتها تلاتة يوم عن واقع الاعلام.
سمعت بها من نقاش الزملاء الزعلانين من التهميش المتعمد دا. بالطبع كتير من الصحفيين زعلوا لعدم الدعوة وليهم حق.ناس موجودة وسط الحرب والضرب وما طلعوا من البلد وقدموا بالكلمة ونقلوا الأحداث أول بأول ووقفوا مع الجيش ورفضوا العروض الاتقدمت ليهم رغم الإغراءات، أقل حاجة يدعوهم.الدعوات للصحفيين بالخارج كان أولى الإتحاد يعملها برة ويدعوا كل الصحفيين بالخارج ومعظمهم بمصر والإتحاد اغلب عضويته بمصر بدل التعب والصرف ويجوا يجتمعوا في السودان ويرجعوا تاتي محل جو.
ويا ترى ما هو سر تحرك الإتحاد الآن لانه كان مختفي طيلة أيام الحرب من عضويته لا سأل مين الطلع ومين الموجود ومين المات ومين الحي ومين المريض ومين الصحيح وترك الساحة فاضية لما قامت رابطة الصحافة الاليكترونية بالواجب ولو ما وصلت كل الصحفيين لكن كانت بادرة جيدة منها. الآن الإتحاد هل جاي لتفقد عضويته وقاعدته الإنتخابية ولا القاعدة جاهزة وموجودة ومشاركة وياها الجات من برة.
ويا اتحاد الصحفيين المنتهية دورته الإنتخابية أسمع كلام الببكيك ما تسمع كلام البضحكك شغل زولي وزولك وشلتي وشلتك خلوه انتو مسؤولين من الكل المعاكم والضدكم.